الفرق بين البنزين 91 و 95‎ -

البنزين الاحمر والبنزين الاخضر أو بنزين 91 وبنزين 95
(او مثل ما نسميه شاي احمر وشاي أخضر إذا جينا بندلع السيارة
وعلى فكرةاللون هذا مجرد صبغة تضاف للتفريق)، واي واحد فيهم
أفضل للسيارة وليi ؟، طبعًا راح اتكلم من ناحية علمية بسيطة, وراح
ابعد عن التجارب الشخصية.
خلونا نراجع طريقة عمل محرك الاحتراق الداخلي في السيارة وراح
استعين بهذي الصورة من الويكيبيديا:

في المرحلة الأول يدخل الهواء والبنزين في غرفة الاحتراق
(الشامبر -الشنابر-) وفي المرحلة الثانية المكبس (البستون -البستم-)
يضغط الهواء والبنزين إلى حد معين وفي المرحلة الثالثة تقوم شمعة
الاشعال (البواجي) باطلاق شعلة بعدها ينفجر الخليط (الهواء والبنزين)
ويتحرك المكبس للاسفل ويحرك السيارة هذي ببساطة الفكرة.
اثناء ضغط المكبس للخليط بعض جزيئات البنزين تنفجر بشكل مبكر
بسبب الضغط (قبل ما تنطلق الشرارة) وقبل ما يكون المكبس في وضع
يسمح بالتحرك للاسفل يعني المكبس يضغط للأعلى والجزئيات اللي
انفجرت بشكل مبكر تضغط للأسفل. وهذا يطلع صوت طقطقة مسموع
حتى لسائق السيارة. وبكذا طبعًا نسبة البنزين اللي المفروض يحترق
بعدين تقل لأن بعض جزيئاته انفجرت مسبقًا، وأيضًا الاحتراق المبكر
هذا يقلل من عمر المكبس (البستم) وحتى غرفة الاحتراق
(بالخصوص راس الشامبر) لأن الانفجارات مثل ما قلنا تعارض
المكبس (البستم) في الضغط يعني هو يضغط فوق والانفجارات
المبكرة تضغط للأسفل.
طبعًا البنزين يتكون بشكل أساسي من مادة الاوكتان والهيبتان، ولما
درسوا الانفجارات المبكرة هذي لقوا سببها مادة الهيبتان لأن الأوكتان
يتحمل الضغط. فقاموا يصنفونه على هالأساس مثلًا ياخذون مزيج
بنزين يتكون من 91% اوكتان و9% هيبتان ويحسبون تحمله
للضغط هذا المزيج يسمونه "بنزين 91"، واي مزيج اخر يتحمل
نفس الضغط يسمونه "بنزين 91" يعني مو لازم يحتوي على اوكتان
بنسبة 91%. يعني الرقم هذا ما يمثل نسبة الاوكتان إنما يمثل قدرة
مزيج البنزين هذا على تحمل ضغط كما لو أن نسبة الاوكتان فيه
91%. وطبعًا هذا يؤدي إلى أنه كل ما صار الرقم أعلى صار
البنزين يتحمل الضغط أكثر. يعني بنزين 95 يتحمل ضغط أكثر
من بنزين 91.
طيب ليه انا اشدد على أن بنزين 91 مثلًا ما يحتوي بالضرورة
على نسبة اوكتان بنسبة 91%؟! لأن فيه إضافات اخرى (غير الاوكتان)
ممكن تزيد من تحمل البنزين للضغط أكثر من الاوكتان مثل الرصاص
ومواد أخرى، يعني بنزين 91 إذا أضفنا عليه بعض مركبات الرصاص
ممكن يتحمل ضغط نفس اللي يتحمله بنزين 95 وبالتالي يصير اسمه
بنزين 95، واكثر من هذا بعض المركبات تزيد التحمل إلى درجات أعلى
بكثير، مثلًا في سيارات السباق يستخدمون بنزين 120 وأكثر،
(وهذا أكيد ما فيه اوكتان بنسبة 120% ) لكن أضافوا له مواد تخلي
المئة لتر -مثلًا- كأن فيها 120 لتر اوكتان!
طيب هل هذا يعني ان استخدام بنزين 95 افضل لسيارتي من بنزين 91
، لأنه يتحمل ضغط اكثر؟! منطقيًا راح تكون الاجابة ايوه، لكن عمليًا لا،
على حسب نوع السيارة، إذا كانت السيارة تنصح ببنزين 91 استخدم 91
، وإذا استخدمت بنزين 95 ما راح تتأثر السيارة بالسلب ويمكن تحس
بنوع بسيط جدًا -جدًا- من التحسن لكن في الأخير انت قاعد تضيع
فلوس اكثر من اللي تتحصل عليه من المكاسب، لأن مصنعين السيارات
صاروا يصنعون المكاين بطريقة تخلي بنزين 91 ما يأثر بالسلب على
ماكينة السيارة بتقليل الضغط وبتقنيات أخرى. لكن اللي يستخدم بنزين
91 وسيارته مصممة لبنزين 95 ممكن يحس بمشاكل وتتأثر سيارته
لكن ممكن أيضًا ما تتأثر لأن فيه تقنيات في بعض السيارات تحس
بالانفجارات المبكرة وتحاول تقلل منها، لكن هذا يدفع فلوس اكثر من
لما يستخدم بنزين 95 يعني هذا يفكر نفسه يوفر وهو في الحقيقة
يدفع اكثر

يعطيكِ العافية عاشقة

هنـآ كل البنزين 95

كل الشكر لمرورك الكريم نورس